Nakibot ang mga pumuluyo sa banwa sang La Castellana sa pag-ilig sang malapuyot nga tubig nga may abo kadungan sang pagtupa sang ulan subong nga Miyerkules sang udto.
Sa interview sang Bombo Radyo Bacolod kay Mari-Andylene Quintia sang Kanlaon Volcano Observatory sa La Carlota City, indi makabig nga lahar ang nag-ilig sa Barangay Biak na Bato kag iban nga bahin sang La Castellana kundi muddy streamflows ukon ash washout ukon pag-anod sang tubig-ulan sa nakadeposit nga abo nga ginbuga sang Kanlaon Volcano.
Suno kay Quintia, ang lahar ang pag-upod sang mga solid ukon boulders sa tubig apang sa karon, abo lang ang nagaupod sa tubig-ulan.
Makusog ang daludo sang tubig sa pila ka sapa sa La Castellana kag iban diri ang nagailig na sa karsada.
Bangud sini, may pila ka bahin sang dalan nga indi maagyan bangud sa madamol nga abo.
Abiso sini sa mga pumuluyo nga magpalayo na lamang sa mga area kun sa diin nagluntad ang muddy streamflow agud mapalayo sa risgo.
Suno kay Quintia, indi man matuod nga may nagluntad nga phreatic eruption sa Bulkan Kanlaon bangod sila ang wala sang namonitor nga eruption signal sa palibot sang bulkan.
