Ginapaabot na sang pila ka political analyst ang pag-absent sang pila ka presidential candidates sa ulihi nga presidential debate nga ginaorganize sang Commission on Elections.
Suno kay Senador Manny Pacquiao, magatambong lang ini sa debate kun magatambong man si anay senador Bongbong Marcos samtang nagpahayag man sanday Ping Lacson kag runningmate nga si Tito Sotto nga mahimo nga sila ang magaabsent bangud hectic ang ila schedule.
Ini matapos nga gin-isol sang Comelec ang final debate sa Abril 30 sa baylo nga karon sa gab-i bangud sa wala nasettle nga balayran sa venue nga Sofitel Plaza.
Sa interview sang Bombo Radyo kay Atty. Jomax Ortiz, ubol na sa tiempo kun Abril 30 kag Mayo 1 ang debate bangud tuman na kasako ang mga kandidato sa sini nga mga petsa.
May nagahatag man sang malisya nga mahimo ginhungod ang postponement sang debate bilang pabor kay Marcos nga makaduha na ka beses nga nag-absent.
Indi man malayo suno kay Ortiz nga diutay nalang nga kandidato ang magatambong sa debate gani indi nalang ini madayon.
Suno sa abugado, indi magtambong ang iban nga presidential candidates bangud ila nakita nga wala man ini sang dako nga bulig sa pagpasaka sang rating sa survey kag para lang ini sa undecided nga diutay nalang.
