Ginakahangawa sang Phivolcs Kanlaon Volcano observatory ang malain nga epekto sa Bulkian Kanlaon hinali nga maglain ang tiyempo ukon mangin maulanon ang panahon.
Sa interview sang Bombo Radyo Bacolod kay Marie Andylene Quintia, may narecord nga 20 ka volcanic earthquakes kag isa lamang ka eruption event alas-3:03 kahapon.
Gilayon man nga ginpasaka sa Alert Level 3 ang status sang bulkan kun sa diin ang anay 4km radius Permanent Danger Zone ang ginpasaka na sa 6 km Danger Zone nga ginapanugyanan nga mag-evacuate.
Ini bangod sa posibilidad sang pyroclastic density current, ballistic projectiles, lava flows kag rock falls.
Paathag ni Quintia nga moderate explosive eruption ang natabo sang Hunyo 3, samtang mas mabaskog ang explosive eruption kahapon bangod may kaupod nga magma kag shockwave, rasun nga bisan sa Bacolod City nabatian ang pagsigabong.
Balantayan suno diri kun maglain ang tiyempo bangod ini ang mahimo makatuga sang lahar flow ukon muddy stream flows sa mga water channels kaangay sang suba kag sapa.
Kaangay sa natabo sang tinalikdan, ang matipon nga ashfall sa ibabaw nga bahin sang bulkan ang mahimo mawash-out sang ulan kag ini ang magaresulta sa lahar flow.
Ang kalabanan nga apektado amo ang mga yara sa nakatungdan nga bahin sang Bulkan Kanlaon kaangay sang La Castellana, Bago City, La Carlota City, Murcia, Hinigaran, Valladolid, Pulupandan, Pontevedra kag San Enrique, kag naglab-ot pa sa Panay Island.
Pasalig naman ni Quintia nga wala sang koneksyon sa Bulkan Kanlaon ang mga nagluntad nga tectonic earthquakes sa Panay kag ang paglupok sang bulkan ang wala man sang koneksyon sa weather situation.
Ginpangabay man nila sa mga Disaster Risk Reduction and Management Offices ang pagpatigayon sang evacuations sa mga yara sa sulod sang 6km radius.
Panawagan naman sini sa mga nagapuyo sa ibabaw nga magsunod sa abiso sang LGU kag magsuksok sang protective gear kaangay sang facemask.
