Malaka nalang mapanimahuan kag madasig nalang ang pag-usbong sang baho gikan sa iti sang mga manok sa Taala Farm sa Barangay Cansilayan, banwa sang Murcia, Negros Occidental.
Interview sang Bombo Radyo Bacolod kay Antonio Villarosa, residente sang Brgy Cansilayan
Sa interview sang Bombo Radyo Bacolod kay Antonio Villarosa, residente sang Brgy Cansilayan, amo gihapon ang kaisog sang subong sang baho, apang malaka na lamang kag mas madasig na nga madula.
Indi kaangay sadto nga nagalawig sang 15 minutos ang ila nga pag-antos.
Dugang pa ni Villarosa nga bangod sa Hangin Habagat, naglain man ang huyop sang hangin kag naga-apekto na sa karun sa training ground sang Murcia Municipal Police Station.
Wala naman sila nagreklamo sa management sang Taala Farm bangod gina-antisipar na nila nga suilt-sulit lamang ang ihatag nga pasalig.
Madumduman nga ginpasalig sang Taala Farm nga doblehon nila ang enzyme agud madula ang baho, seguruhon nga wala na naga-awas sa sapa ang iti kag para sa long term plan, magatukod sang bodega kag didto na himuon ang mga proseso sa paghimo sang iti bilang fertilizer agud indi na makagwa ang baho kag makaapekto sa mga pumuluyo.
Apang suno kay Villarosa, wala paman sila may nakita nga gintukod nga bodega, sa baylo, may gintukod nga bag-o nga hatchery ang Taala Farm malapit sa National High School. SAMTANG….ginkumpirmar sang Punong Barangay sa Barangay Cansilayan, Murcia nga tumalagsahon na lamang kag madali man madula ang baho sang iti gikan sa Taala Farm.
Sa interview sang Bombo Radyo Bacolod kay Punong Barangay Edgar Daquipil, aminado ini nga may tumalagsa nga pag-usbong sang baho, apang ini ang malaka na lamang kag madasig man nga madula nga yara na lamang sa tubtob tatlo ka minutos.
Suno diri, ang monitoring team sang Barangay kasubong man ang Municipal Monitoring Team ang mahimo lamang makatsekyar sa Taala Farm.
Apang wala na nila ginlantaw gid kun natuman ang promisa sa pagdoble sang enzyme, bangod sila ang nagatulok na lamang sang resulta.
Nakita man sini nga nag-ayo na ang sitwasyon.
Wala paman ini may nakita nga ginatukod nga bodega nga ginpromisa sang Taala, nga dira na lamang himuon ang pagproseso sang iti agud mangin fertilizer.
Apang ang nakita nila nga tikang sang Taala Farm amo ang pagtanom sang mga kahoy.
Interview with Punong Barangay sa Barangay Cansilayan, Murcia
Suno kay Daquipil, may ginbakal nga duta ang Taala Farm malapit sa National High School nga plano nila nga himuon nga Barangay Forest Area.
Ini ang isa sa ginalantaw nga pamaagi agud mapunggan ang pag-alisngaw sang baho.
Sa pihak nga bahin, una naman nga nagpahayag ang division chief sang Environment Management Bureau Reion 6 nga ginarequire ang Taala Farm nga magsumiter sang Environmental Compliance Certificate (ECC).
Apang antes sini, sila ang kinahanglan nga magpangayo sang Resolution of No Objection sa Barangay Council.
Suno kay Daquipil, wala sila sang ihibalo angot diri bangod ang nahibaluan lamang nila nga nagpatigayon na sadto ang Taala Farm sang public hearing sa mga nagliligad nga administrasyon para sa pagkuha sang Certificate of Non-Coverage (CNC) angot sa fertilizer processing.
