Ginpahayag sang anay konsehal kag bise alkalde sang ciudad sang Bacolod nga ang pag-voluntary surrender ang isa ka mitigating circumstance sa akusado kun mapamatud-an nga nakahimo siya sang krimen.
Sa interview sang Bombo Radyo Bacolod kay Atty. Renecito Novero nga sa proseso sang pag-aresto, ginpahayag sang abogado nga ang mga arresting officer obligado nga ipahibalo sa akusado kag i-serbe sa iya ang warrant of arrest.
Ang warrant ang mahimo nga ipatuman sang Philippine National Police ukon sang iban pa nga authorised law enforcement agency.
Suno kay Novero, ang mugshot ang ginakuha kun yara na sa kustodiya sang law enforcement agency bilang kabahin sang standard procedure.
Samtang ang kantidad sang piyansa nagadepende sa kaso kag sa kadamuon sang charges ukon counts.
Sa kaso sang ni Vice President Sara Duterte, P120,000 ang bail gani nagbayad ini sang P360,000 bangud 3 counts ang ginpasaka nga kaso sang grave threats.
Suno sa anay konsehal, sa tion nga makabayad na sang piyansa kag nakumpleto na ang kinahanglanon, magwa na ang order of release halin sa korte, mahimo na siya makagwa kag makabenepisyo sang temporary liberty.
Ginpahayag man ni Novero nga ang korte bukas para sa mga emerhensya kag importante nga transaksyon, kalakip ang mga aplikasyon para sa piyansa kag release order bisan sa weekends kag holidays kag bangud may mga proseso para sa urgent nga mga butang, suno sa kinahanglanon kag jurisdiction sang korte.
