Ginpahayag sang Presidente sang Alliance of Concerned Consumer in Electricity and Social Services (ACCESS) nga may yara sang pagbag-o bisan paano ang pagserbisyo sang Negros Electric and Power Corporation (NEPC) sa ciudad sang Bacolod.
Sa interview sang Bombo Radyo Bacolod kay Wennie Sancho, may yara sang pagbag-o sa pagserbisyo sang NEPC apang indi man tanan nga consumer ang nasatisfy ilabi na ang mga lugar nga may yara sang power outages.
Suno kay Sancho ang isa sa improvement nga nakita sang mga ini ang sa communication sang NEPC bangud may yara na sang nagasabat sang mga queries indi kaangay sadto sa CENECO nga ginapabay-an lang.
Suno diri, napanilagan sini nga bisan ginabasol sang mga consumers ang Negros Power bangud sa brown-out, nagapasalamat ang mga ini sagihapon.
Ginpahayag man sini nga bisan nga may yara sang pagbrown-out, makita man nga ini nga ginatrabaho sang NEPC ang dapat trabahuon.
Bilang labor advocate, gindayaw man sini ang dedikasyon sang mga linemen sang NEPC nga nagasulay sa ulan kag init agud lamang makay-o ang mga guba nga linya sang kuryente.
Nagpanugyan man ini sa tanan nga mga konsumidor nga hatagan sang nagakaigo nga tinion ang NEPC bangud indi magdugay makay-o na ang tanan kag magmaayo na ang supply sang kuryente sa probinsya.
Suno diri, indi man gilayon nga mabag-o ang tanan bangud bag-o pa lamang nagtake over ang NEPC kag padayon ang ila nga pagpangkay-o kag pag-ilis sang dapat nga islan nga linya sang kuryente.
