Pagbaha sa Brgy Bata, Bacolod City, nakumpirmar nga tuga sang nagbara nga mga basura sa drainages

Ginkumpirmar sang Punong Barangay sang Barangay Bata, Bacolod City nga nagsaka ang tubig sa nasambit nga Barangay bangud sa mga nagbara nga basura sa drainages.

Sa interview sang Bombo Radyo Bacolod kay Punong Barangay Remus Abaring, madamo sang basura nga nagbara sa mga grills sang drainage rason nga indi madasig makagwa ang tubig gani nagbaha.

Ginpakuha naman sang Punong Barangay ang basura agud nga makailig ang tubig kag masubside ang tubig baha.

Suno kay Abaring ang mga nabahaan ang wala man nag-evacuate bangud masarangan pa man nila.

Ginpadul-ungan nalang sini sang foodpacks ang mga nabahaan bangud indi ang mga ini makagwa.

Nagpanawagan man si Abaring sa tanan nga mangin responsable sa paghaboy sang basura agud nga malikawan ang pagbaha.