Gin-athag sang city administrator sang ciudad sang Bacolod nga magadepende sa mga establishment kun ila pasudlon ukon indi pagpahanugutan ang mga pumuluyo nga wala sang BACTRAC ID.
Sa interview sang Bombo Radyo kay City Administrator Em Ang, ginpahayag sini nga yara sa mga establishemento ang desisyon kun magarequire sila sang BACTRAC ID sa tanan nga mga magasulod nga pumuluyo.
Suno kay Ang, apisar nga wala sang penalidad ang mga pumuluyo nga indi makaparehistro sa BACTRAC, requirement na ini sang ciudad agud mas mapahapos ang contact tracing kag mapanubo ang risgo sang transmission bangud contact less ini nga pamaagi.
Gindugang man sini nga kinahanglan batunon sang tanan nga kabahin na ini sang new normal.
Gani suno sa iya, kun may magreklamo nga indi pagpasudlon sa mga establishment bangud nga wala sang BACTRAC ID, ibalik sa iya ang pamangkot kun ngaa indi na lang ini magparegister agud wala na sang problema.
Suno sa city administrator, madasig lang ang pagparehistro bangud device kag internet connection lang ang kinahanglanon apang kun wala sini, sarang man nga makakadto sa barangay hall agud nga magpangayo sang assistance.
Suno kay Ang, ginhatagan sang isa pa gid ka bulan nga moratorium ang mga establishments sa ciudad nga makabutang sang scanner bangud may natalana nga penalidad kun indi ini macomply.
Suno diri, pagkatapos sang Nobyembre 12, magasugod na ang mga business process outsourcing kag City Legal Office sa pag-inspect sa mga establishment.
Suno sa iya, P1,000 ang penalidad sa first offense; P2,500 sa second offense; kag P5,000 sa third offense.
Wala naman sang penalidad ang mga pumuluyo nga wala nakaparehistro magluwas lang kun magamit ini sang ID nga indi iya.
