Nadesisyunan sang Sangguniang Panlungsod sa ciudad sang Bacolod nga indi pagpahanugutan ang mga vendors nga magbaligya sa atubang sang San Sebastian Cathedral sa maabot nga holiday season.
Suno kay Councilor Dindo Ramos, ila nahisugtan nga indi na pwede makabaligya ang mga vendors sa atubang sang simbahan magluwas na lamang kun MassKara Festival.
Ini apisar may yara sang ginpadala nga sulat si Bishop Patricio Buzon, Diocese of Bacolod sa city council nga nagahingyo sang reconsideration nga pahanugutan ang pagbaligya sa atubang sang simbahan.
Apang, panindugan ni Ramos, human na ang ila desisyon kag mangin ‘unfair’ sa iban nga mga vendors kun pasugtan nila ang pagbaligya sa atubang sang simbahan kasunod sang road clearing operations nga ginpatigayon.
Nahibaluan nga bilang kabahin sang usufruct agreement, ang mga vendors sa atubang sang cathedral ang nagabayad sang ila renta sa simbahan apisar pa nga sa city government sila nagakuha sang mga permit.
