Ginpahanugutan na sang city government sang Bacolod ang pagbaligya sang mga vendors sa dalan Rizal ukon sa atubang sang San Sebastian Cathedral subong nga holiday season.
Sa interview sang Bombo Radyo kay Councilor Ana Marie Palermo, ginkompirmar sini nga napirmahan na ang Executive Order sang Paskwa sa Plaza nga ginpagwa ni Mayor Evelio “Bing” Leonardia.
Suno kay Palermo, tuyo sang Paskwa sa Plaza ang mahatagan sang lugar ang tagsa-tagsa ka pamilya nga makaselebrar bangud may yara sila sang ipreparar nga mga Christmas presentations kag mga kalingawan kag mahatagan man sang oportunidad ang mga vendors nga makabaligya sa Bacolod Public Plaza.
Ginpaathag man sang konsehal nga ginapahanugutan lang nga makabaligya diri halin Disyembre 3 tubtob una nga semana sang bulan sang Enero kag dapat sila nga magkuha sang special permit.
Isa ka vendor ang nagdangop sa Bombo Radyo agud ireklamo ang pagguba sa ila nga stall sa atubang sang San Sebastian Cathedral.
Si Teresita Zurrudo ang isa sa mga manugbaligya nga nagpatukod sang ila nga stall sa atubang sang San Sebastian Cathedral apang kahapon, nagdangop ini sa Bombo Radyo agud nga magreklamo bangud ginpangbaklas sang mga taga City Legal Enforcement Team ang ila nga mga ginpatukod.
Suno kay Zurrudo, indi man sila kuntani magset-up apang ginpahanugutan na sila sang ila nga organizer nga iya gin-ngalanan kay Veepee Binas nga sarang na sila nga makadisplay para sa Paskwa sa Plaza.
May yara man si Binas sang papel nga ginhatag halin sa Bacolod Government Center kag Mayor’s Office suno sa iya.
Gindugang niya man nga wala sila nakahibalo kun permit ang ginhatag ni Binas bangud halin sang una suno sa iya, naanad na sila nga ang organizer ang tingub nga nagaproseso sang ila mga papeles.
Nagalain man ang buot sini bangud nag-ayo sila nga sila lang ang manghimos sang ila mga ginpatukod nga stall apang suno sa iya, wala gid nagpamati ang City Legal Enforcement Team gani may iban nga mga gamit kag baligya nga nagkalaguba.
Naga-apelar na kay Mayor Evelio Leonardia ang mga manugbaligya sa atubang sang San Sebastian Cathedral sa ciudad sang Bacolod nga buligan na lang sila nga matigayon ang tanan nga kinahanglanon nga permit.
Sa interview sang Bombo Radyo Bacolod sa isa sa 54 ka mga vendors sa lugar, naga-apelar na lang ini sa alkalde nga buligan sila agud masuguran na nila ang pagbaligya bangud nga dako na ang ila ginpangutang agud maka-display sa atubang sang Dalan Rizal nga tuigan na nila nga ginahimo.
Suno diri, ginhambalan sila sang ila organiser nga si Veepee Binas nga indi sila makabaligya bangud nga kulang pa sila sang permit gikan sa Department of the Interior and Local Government (DILG).
Ang nainterview sang Bombo Radyo Bacolod, ang nagabaligya sa atubang sang cathedral humalin pa sang 2008.
Bangud sini, nagpanugyan si Bacolod City Vice Mayor El Cid Familiaran sa mga luyag magbaligya sa dalan Rizal nga sundon ang husto nga proseso.
Suno kay Familiaran, istoryahan pa sang City Legal kag Department of the Interior and Local Government (DILG) ang status sang Bacolod Public Plaza bangud nahibaluan nila nga sa San Sebastian Cathedral nagabayad ang mga vendors.
Suno sa bise-alkalde, wala sang respeto ang ila gin-ubra nga pagpatukod sang mga stalls bangud wala pa sang approval halin sa Office of the Mayor kag sang Huwebes lang niya napirmahan ang resolusyon sang City Council.
Ginpaathag man sini nga kinahanglan sang mga vendors nga magkuha sang permit kag kun ma-approve na ini, sarang na sila nga makabaligya.
Gindugang niya man nga gin-abisuhan na sang City Legal Office ang mga vendors nagligad nga mga inadlaw nga indi magpatukod nga wala sang approval apang wala nila ini ginpati.
Nagpanawagan man ini sa organiser nga respetuhon ang gobyerno kag sundon ang husto nga proseso agud nga wala sang problema.
