Dako ang kalipay sang Bacolodnon nga isa sa liwat nga nakabakal sang P20 per kilo nga bugas kaina sang aga sa Negros Occidental Provincial Capitol.
Kaina sang aga, ginsaulog ang ika-68 nga kaadlawan ni President Ferdinand “Bongbong” Marcos Jr. paagi sa pagpatigayon sang “Handog ng Pangulo: Serbisyong Sapat Para sa Lahat” program kun sa diin nagpanghatag sang kapin P100 million interventions.
Isa sa highlight sang aktibidad ang pagbaligya sang 300 ka sako sang bugas sa balor nga P20 gikan sa National Food Authority kag Food Terminal Incorporated (NFA-FTI).
1,500 naman ang mga consumers nga nakabakal sang naputos na nga 10 ka kilo ukon balor P200 nga bugas.
Sa interview sang Bombo Radyo Bacolod kay Rene Bayot, private driver kag residente sang Barangay 34, dako ang pasalamat sini nga liwat nakabakal sang barato nga bugas.
Suno sa iya, nakabakal naman siya sang nakaligad kag napamatud-an na nga maayo nga kalidad ang bugas.
Ginhatagan gid sini sang tiyempo ang paghingagaw nga malakip sa 1,500 nga makabakal.
Suno sa iya, ang regular nila nga ginabakal nga bugas ang balor P56 gani dako ang masave sini sa napulo ka kilo nga P20 lamang ang presyo.
Nagpalab-ot man ini sang pagtamyaw sa kaadlawan sang Presidente.
