Nagapati ang political analyst nga mahimo gamitun nga dako nga issue sa 2025 Midterm Elections ang pagbaligya sang Bangko Sentral ng Pilipinas sang gold bullion.
Sa interview sang Bombo Radyo Bacolod kay Atty Jomax Ortiz, ang central bank ang nagarequire sa mga commercial banks nga magbilin sang 15 percent sang kwarta sa vault agud magamit sa withdrawals.
Samtang ang 85 percent ang sarang naman nga magamit sa iban nga purpose partikular na sa investment.
Ini bilang pagpangaman agud malikawan ang pagcollapse sang bangko hinali nga mas mataas ang withdrawals sangsa deposit.
Sa pihak nga bahin ang nagaserbe naman nga deposito sa Central Bank amo ang gold bullion.
Ini bangod ang kwarta ang unstable kag madasig nga naga-inflate ukon deflate, samtang mas estable naman bilang liquid asset ang gold reserve.
Ang gold reserve ang nagaserbe naman nga collateral sa paghulam gikan sa mga International Banks kun sa diin sa karun ang utang sang Pilipinas ang nagdangat na sa P13 trillion.
Ang Central Bank ang makadesisyon naman sa pagbaligya sang gold bullion sa pahanugot sa Presidente.
Nagapati si Ortiz nga ang tikang ang pahanugutan lamang sa tuman ka seryoso nga rasun.
Gani ginalantaw na sini nga gamiton sang oposisyon nga dako nga issue ang pagbaligya sang gold reserve batok sa administrasyon.
Nagapati si Ortiz nga ipagwa man sang BSP ang rasun kun ngaa sila ang nagbaligya sang gold bullion.
