Nagaserbe nga source sang extra nga allowance sa pag-eskwela ang pagbulig sang isa ka first year college student sa isa ka flower shop sa tion nga may okasyon.
Sa interview sang Bombo Radyo Bacolod kay Ras Solera, flower vendor sa Risa Flowershop sa Lacson Street, Brgy Mandalagan, Bacolod City, 10 anyos pa lamang siya sang magsugod sa pagside line sa flowershop.
Ang flowershop ang ginapanag-iyahan sang maninay sang iya magulang.
Si Solera, 18 anyos, ang sa karun 1st year college student sa Bacolod City College sa kurso nga Bachelor of Science in Office Administration (BSOA).
Suno sa iya, nakaandan na sini nga sa tion sang mga okasyon kun sa diin nagabaligya sang mga bulak, imbes nga maglagaw mas ginapili sini nga magbaligya sa flowershop agud makadugang-dugang sa iya allowance sa pag-eskwela.
Mensahe sini sa mga kaangay nga estudyante nga magtinguha man nga makapangita sang extra nga income ilabi na sa karun nga tuman ka piot sang pagpangabuhi samtang nagpreparar na sang madamo nga mga basket kag bouquet sang bulak ang mga flower vedors sa Bacolod City Public Plaza para sa UNDAS.
Sa interview sang Bombo Radyo Bacolod kay Alyas Sammy, kahapon gin amat-amatan na nila ang pagpadamo sang flower arragements bangod sa ginalauman nga pagdamo sang bumalakal.
Nagdangat naman kahapon sa 100 ang nagbalak sa iya sang mga bulak samtang ini ang nag-arrange sang 200 nga flower baskets para sa subong nga adlaw.
Ang iya mga flower baskets ang mabakal sa presyo nga P200 kag P500.
Kalabanan naman sa mga nagabakal ang ginikanan.
Aminado ini nga iban sa mga flower vendors ang ginabaklan na sang wholesale kag may mga nagapareserve apang sa iya, lunsay mga walk-in pa lamang ang customers kahapon.
Suno sa iya 160 ka mga flower vendors ang yara sa karun sa plaza.
Sila ang magabaligya sa lugar tubtob sa Nobyembre 2.
Wala naman sang pagsaka sa presyo sang bulak subong nga tuig.
Pahayag ni Sammy nga siya ang nagabaligya sang bulak sa tion lamang sang mga okasyon kaangay sang tigkalalag, valentines day, father kag mothers day kasubong man sila ang ginahire para sa flower arrangement sa kasal… Bukas ang flower vendors sa Lacson Street, Brgy Mandalagan, Bacolod City sa mga customer nga luyag sang customized nga arrangement depende sa available nga budget.
Sa interview sang Bombo Radyo Bacolod kay Risalina, vendor sa Risa Flowershop, P500 ang ila mga bulak nga naka-vase samtang P150 naman ang yara sa basket.
Apang luwas diri, sarang gid makarequest ang mga customer kun ano nga bulak ang ibutang kag kun ano nga desinyo depende sa masarangan sang ila budget.
Suno naman kay Ronalyn, sila ang nagsugod sa pagdisplay kahapon kun sa diin ang buena mano nga customer ang nagbakal 10 ka all-white nga boquet.
Nagalaom sila nga magadamo pa ang manugbakal subong nga adlaw bangod special non-working holiday kag pakadto sa Nobyembre 1 tubtob 2 kag madamo na sang magakadto sa patyo.
Sila ang magabaligya tubtob sa gab-i sang Nobyembre 2, depende sa supply sang bulak.
Pito sila nga nagatrabaho sa flowershop bangod ang tag-iya ang nagpwesto man sa Bacolod Downtown Area.
May ginapaabot pa ang mga ini nga dugang nga supply sang bulak.
