Tinutuyo sang ciudad sang Bacolod nga I-regulate ang pagbaligya sang butane kasunod sa mga reported nga mga fire incidents sa ciudad.
Suno kay Bacolod City Legal Office Head Atty Romeo Carlos Ting Jr, dapat nga registered supplier ang baklan sang butane kag ang kompanya nga nagarefill sini dapat nga lisensyado kag may papeles nga gina-uyatan.
Suno diri, sa pagpatsekyar sang City Legal Office sa Business Permits and Licensing Office (BPLO), natukiban nga wala sang registered refilling company sa ciudad sang Bacolod.
Ginklaro man sini nga wala sang problema sa pagbaligya sang butane, basta lehitimo ang supplier kag may lisensya ang refilling station.
Magapatigayon man sang inspection kag monitoring ang City Legal Office kaupod ang BPLO kag Bureau of Fire Protection- Bacolod sa mga merkado agud ma-identify ang nagabaligya kag diin ginakuha ang supply.
Kun may yara naman sang nagabaligya nga indi lehitimo, igakumpiskar ang mga ginabaligya nga butane.
Kagab-i ginpahanumdom sang ciudad ang ordinansa nga pagdumili sa pagtughong, pagbaligya kag paggamit sang gintughungan nga butane.
May yara sang penalidad nga P3,000 tubtub P5,000 sa kun sin-o man ang magalapas sa sini nga layi.
