Tinguhaan sang Bacolod City Government nga masuguran na ang pagbaligya sang P20 kada kilo nga bugas sa masunod nga semana.
Madumduman nga nag-anunsyar na kahapon ang Department of Agriculture sang resumption sang P20 per kilo rice program.
Sa interview sang Bombo Radyo Bacolod kay Secretary to the Mayor Atty Marty Go, ginahulat na lamang nga makapagwa sang purchase order ang bids and awards committee agud nga makabakal na sang bugas sa National Food Authority.
Ang proseso ang nasuguran na apang naabtan sang eleksyon, apang ini ang ginhingagaw man gilayon kasunod nga adlaw Mayo 13.
Kun may-ara na sang purchase order, ang ciudad ang makabakal sang 5,800 ka sako sang bugas, nga amo ang available sa NFA warehouse.
Yara naman ang budget nga P7.7 million, lakip na diri ang P6.50 nga subsidy sang local government.
Ginalauman nga makompleto na ang proseso kag ang bugas ang mabaligya na sumugod sa masunod nga semana.
Ini ang ginalantaw nga ibaligya sa Kadiwa store sa idalom sang Bacolod City Government Center kag selected named Barangays.
Ang priority sa nasambitan nga programa amo ang vulnerable sector kaangay sang 4Ps beneficiaries, senior citizen, persons with disability kag solo parents.
Samtang maximum nga napulo ka kilo lamang ang mabakal sang kada pamilya sa isa ka semana, ukon kabug-usan nga 40 ka kilos sa isa ka bulan.
Pasalig ni Go nga kun maayo ang feedback, sila ang liwat nga magabakal kun may available na nga supply sa warehouse.
