Magaumpisa na sa pagpabaligya sang palupok ang mga vendors sa reclamation area sa ciudad sang Bacolod subong nga adlaw, Disyembre 17, 2025.
Sa interview sang Bombo Radyo Bacolod kay Ryan Villaruz, Representative sang Bacolod City Fireworks and Firecrackers Association, kahapon natapos na ang ila nga fire drill kag nagpatuman naman sang inspection ang personnel sang Bacolod City Fire Station sa mga stalls.
Suno kay Villaruz, may yara na sila sang permit kag mahimo na ang iban sa ila nga makaumpisa sa pagbaligya subong nga adlaw.
Pahayag ni Villaruz, nga may ginakuhaan sila nga supplier diri sa Bacolod kag sila ang nagakuha man sang palupok gikan sa Bulacan.
Nagapadayon man ang checking sang Bureau of Fire Protection kag iban pa nga ahensya sa mga stalls.
Nagpangagda man ini sa mga luyag nga magbakal sang palupok sang temprano nga sila ang bisitahan na lamang sa reclamation area sa likod sang Pope John Paul II tower.
