Nag-umpisa na ang pagbaligya sang mga palupok sa ciudad sang Talisay, Negros Occidental.
Sa interview sang Bombo Radyo Bacolod kay Poloy Britania, firecracker vendor, siya ang 10 ka tuig na nga nagabaligya sang mga palupok samtang lima naman ka tuig nga nagapwesto sa higad sang dalan sa Barangay Zone 14, Talisay City, nga amo ang designated area para sa pagbaligya.
Ang ila mga firecrackers kag pyrotechnics ang ila naman nga ginakuha gikan sa banwa sang Hinigaran, ang pyrotechnic capital sang Negros Occidental kasubong man sa Bulacan.
Madumduman nga nagpahayag si Department of the Interior and Local Government (DILG) Secretary Benhus Abalos nga iduso sini ang pagban sang paggamit sang palupok subong nga holiday season.
Nagahingyo si Britania nga kaluy-an sila nga mga firecracker vendor bangod ini ang nagabuhi sang ila pamilya.
Pahayag sini nga P200,000 ang kuha sini sang mga palupok samtang P50,000 ang iya down payment.
Ang nabilin nga kantidad ang ginabayaran nila matapos ang bag-ong tuig gamit ang ila kinitaan, apang sa tion nga indi maubos, ang mga palupok ang indi naman mahimo nga ibalik.
Suno kay Britania, ginapatago nila sa ila dealer ang mga palupok nga indi maubos sa pagbaligya.
Apang nagapati ini nga maubos niya ang ginabaligya nga palupok subong nga tuig.
Agud indi na mapatuman ang total ban sa palupok, hingyo na lamang ni Britania sa mga nagabakal sang palupok nga maghalong sa paggamit sini samtang dapat man nga giyahan ukon dumilian sang mga ginikanan ang mga menor de edad sa paggamit sang palupok.
Panindugan sini nga bangod siya ang mahinalungon, apisar sa napulo ka tuig na nga nagabaligya, wala pa ini nakaagi nga nalukpan sang palupok.
Dugang pa sini nga alang-alang naman kun karun pa ipatuman ang banning sa palupok ilabi na nga sila ang nakakumpra na sang baligya kag madamo naman sang mga nakabakal.
12 tanan ang mga firecracker vendors sa Talisay City kun sa diin duha sa mga ini ang nagabaligya sa designated area sa Barangay Concepcion.
