Ginalantaw sang political analysts sa ciudad sang Bacolod nga dako ang mangin impluwensya sa kandidatura ni Vice President Sara Duterte kun magapapili ini bilang presidente sa 2028 presidential elections ang kadalag-an ni Republican Donald Trump.
Suno kay Atty. Jomax Ortiz, maayo ang relasyon ni anay Presidente Rodrigo Duterte kag ni Donald Trump sang ini ang nagpungko nga presidente sang Estados Unidos sadtong 2017 tubtob 2021.
Samtang, ginpahayag man ni Ortiz nga tion lamang ang makahambal kun ano ang foreign policy ni Donald Trump angot sa conflict sa tunga sang China kag Pilipinas sa West Philippine Sea.
Suno diri, pila sang mga factors nga nagdaog si Donald Trump amo ang panindugan sini nga pagpasira sang mga borders sa America agud nga macontrol ang ekonomiya sang nasambit nga pungsod.
Ginapahayag man sang abugado nga sang nagpungko man nga presidente si Trump sadto nagsaka ang sweldo sang mga mamumugon kaangay lamang sang ginhimo ni President Duterte sadto sa mga uniformed personnel.
Sa karun tion nalang ang makahibalo kun ano ang foreign policy ni Trump sa West Philippine Sea bangud luyag sini ang global peace.
Ginalantaw nga makig-abyan si Trump sa mga pinuno sang China, Russia kag iban pa agud nga malikawan ang kagamo.
