Ginpalawig pa sang Negros Occidental Provincial Government ang pagpatuman sang ban sa tanan nga manok kag poultry products sang isa pa ka bulan bangod sa pagdugong sang birds flu sa Luzon.
Ginpagwa ni Governor Eugenio Jose “Bong” Lacson ang Executive Order (EO) No. 22-10 series of 2002 nga naga-implementar sang temporaryo nga pagban sa tanan nga live, domestic kag wild birds kalakip na ang poultry products, itlog, semen kag manure nga gikan sa mainland Luzon, kag iban pa nga mga lugar kun sa diin nakarecord sang highly pathogenic avian influenza (H5N1) virus.
Madumduman nga una nga nagpatuman sang ban ang Negros Occidental sang Marso 1 tubtob 15, kag sa karun bangod sa nadugangan pa ang mga local government units (LGUs) nga may kaso sang birds flu, ini ang gin-extend sang gobernador humalin sang Marso 16 tubtob sa Abril 15.
Ini ang paagi naman sang provincial government agud nga maproteksyunan ang poultry industry, kalakip na ang broiler agud nga indi masudlan sang balatian.
Nahibaluan nga ang birds flu ang dala sang mga migratory birds kun sa diin indi lang manok ang nalatnan sini sa Pilipinas kasubong man ang mga pato.
Suno kay Negros Occidental Provincial Veterinarian Dr Renante Decena, naglapta nagid ang birds flu sa karun gani gindugangan sang Negros Occidental sang 30 ka adlaw ang pagban.
Pasalig naman sini nga bisan pa may ban kag indi makapasulod sang dressed chicken ukon broiler kasubong man sang itlog sang manok kag bebe sa probinsya, indi man ini makatuga sang pagmahal sang produkto bangod bastante man ang supply sa Negros Occidental.
