Pasanyugon naman sang Coast Guard-Northern Negros Occidental Station ang pagbantay sa mga pantalan sa ciudad sang Bacolod agud nga masiguro nga wala sang makasulod nga kontrabando kag malikawan nga matabo ang bombing incident nga nagluntad sa Mindanao State University Gymnasium sa Marawi City.
Sa interview sang Bombo Radyo Bacolod kay Commander Joe Luviz Mercurio, commander sang Coast Guard-Northern Negros Occidental Station, hugton pa sang mga ini ang pagbantay kag i-utilize sang mga ini K-9 units sang Philippine Coast Guard sa ciudad sang Bacolod.
Suno kay Mercurio, nagalaom ini nga mapadal-an pa sila sang dugang nga K-9 force santo man sa ila nga ginrequests bangud naoverstress na ang sa karun nga K-9 sang Coast Guard-Northern Negros Occidental Station.
Ginpahayag man sini nga tuman ka importante nga madugangan ang K-9 units bangud ang K-9 dogs ang may limitasyon kag dapat may yara sang ibulos diri bangud indi man ini mahimo nga bilog nga adlaw isa lang ka K-9 dog ang gamiton para sa inspection.
Nagpasalamat man ang commander sang Coast Guard-Northern Negros Occidental Station nga wala sang may nadetect nga mga kontrabando sa active ports sa ciudad sang Bacolod kag sa probinsya sang Negros Occidental.
