Apisar sang kasakuon magapadayon ang Task Force Disiplina sa pagbantay agud nga mapatuman ang minimum health protocols kadungan sang pagpaidalom sang syudad sa Alert Level 2 sumugod bwas nga adlaw Pebrero 16, 2022.
Sa interview sang Bombo Radyo Bacolod kay Task Force Disiplina head Wilfredo Geolingo, ginpahayag sini nga sa tion nga ipaidalom ang syudad sang Bacolod sa Alert level 2, lauman naman ang madamo nga mga tawo ang magagwa sa ila balay.
Ginapanugyan ni Geolingo sa mga pumuluyo nga magagwa sa ila puluy-an kadungan sang pagbalhin sang alert level system sang syudad, nga masami isuksok ang facemask kag magsunod sa minimum health protocols.
Ginpahayag man sini nga ang task force disiplina ang magapadayon sa pagremind sa mga pumuluyo sa pagsunod sang minimum health protocols batok sa COVID-19 kadungan sang paghalog sa mga restrictions.
Samtang, nagapasalamat naman ang business sector sa liwat nga pagbalik sang National Inter-Agency Task Force (NIATF) sa syudad sang Bacolod kag probinsya sang Negros Occidental sa Alert Level 2.
Suno kay Metro Bacolod Chamber of Commerce and Industry (MBCCI) Chief Executive Director Frank Carbon, ginpahayag sini nga apisar nga magabag-o na ang alert level system sang syudad sang Bacolod kag probinsya sang Negros Occidental, dapat magsunod sa gihapon sa ginapatuman nga health protocols bangud ang COVID ara sa gihapon.
Ginpahayag man ni Carbon nga dapat ang gobyerno national kag local ang magagasto sa paghimo sang trabaho agud nga magcirculate ang kwarta.
Kasubong man mapahulam sang kwarta sa mga negosyante agud nga makabukas na ang mga ini kag malab-ot ang economic recovery.
