Temporaryo nga ginhold ang pagbaton sang mga ginadonar nga panapton para sa mga pumuluyo sang Brgy 27, Bacolod City nga nasunogan sang Biyernes.
Suno kay Bacolod City Mayor Greg Gasataya, dapat may yara sang plano kun paano madistribute ang nga ginapanghatag nga bulig sa mga biktima nga yara sa karun sa evacuation center.
Suno diri, 256 ka pamilya ang narekord nga biktima sang sunog apang ginavalidate pa kag ginafinalize ang lista.
Bangod madamo sang nagpalab-ot sang bulig, suno sa alkalde wala anay sang batonon nga mga ipanghatag nga panapton bangod wala pa sang mahimo nga butangan kag kun mafinalize na ang listahan didto na mahibaluan kun ano nga panapton ang kinahanglan sang tagsa ka pamilya.
Sa mga bugas naman kag non perishable goods nga ginhatag, tagoon anay ini agud matingob nga ma-inventory kag ihatag derekta sa mga pamilya sa tion nga makahalin na sila sa evacuation center.
Suno kay Gasataya, mabudlay nga ihatag ini sa mga biktima kag ipahigad lang man nila bangod bastante man sila sa pagkaon sa evacuation center.
Ginalantaw nga isaylo ang mga biktima sang sunog sa Brgy Taculing kag Brgy Vista Alegre matapos ang 15 ka adlaw nga pagtinir sa Apolinario Mabini Elementary School.
