Bukas ang bise alkalde sa ciudad sang Bacolod sa pagtuon sa pagsaylo sang petsa sa highlights sang Masskara Festival 2024.
Sa interview sang Bombo Radyo Bacolod kay Vice Mayor El Cid Familiaran, wala pa sang may nafile nga proposal sa Sangguniang Panlungsod natuhoy diri.
Nahibaluan nga ginpahayag ni Councilor Jason Villarosa, chairperson sang Committee on Tourism, nga may inisyal na nga paghinun-anon sanday Bacolod City Mayor Alfredo “Albee” Benitez kag Bacolod City Lone District Congressman Greg Gasataya angot sa pag-amyenda sang petsa sang highlights sang Masskara Festival.
Paathag ni Villarosa nga ini ang luyag amyendahan bangod masami nga nagasulod ang bagyo sa ulihi nga semana sang Oktubre.
Suno kay Familiaran, maayo man nga matun-an ang proposal kag magpangita sang mas maayo nga opsyon.
Paathag sini nga sadto tubtob lamang Oktubre 19 ang Masskara Festival kag ulihi na nga nasaylo sa ulihi nga Dominggo sang Oktubre.
Suno diri bangod sa Severe Tropical Storm Kristine, madamo sang mga negosyante nga nagrenta sang kiosks ang namierdihan samtang wala man maka-enjoy ang mga pumuluyo kag turista.
Ginalantaw ni Familiaran nga ang pagsaylo sang petsa sang highlights sang Masskara Festival ang kaangay man sa pagsaylo sang School Calendar, kag nagapati ini nga mas maayo nga makakuha sang collective response partikular na sa pumuluyo.
Ini bangod kun yara ang simpatya sang mayorya sa proposal, indi na magakinahanglan sang paligwat-ligwat nga ordinansa.
