Gina-imbestigaran sang mga otoridad sa Colorado, USA ang isa ka insidente kun sa diin indi magnubo sa 12 ka mga balota ang kaangay nga gin-intercept antes paman makalab-ot sa mga botante nga luyag magboto.
Ang mga na-intercept nga mga balota para sa November 5 US Presidential Election ang ginpuno kag ginpadala sa county clerk sa Mesa County, sa Western Colorado.
Apang wala man ini nagpahayag kun sila bala ang ginmarkahan para kay Republican presidential nominee Donald Trump ukon kay Democrat nominee Vice President Kamala Harris, ukon iban pa nga kandidato.
Apang maathag ang plano sa pagpangdaya sa balota nga natukiban matapos nga pila ka mga apektado nga botante ang nakabaton sang abiso nga naproseso na ang ila balota kag ini ang kinahanglan tadlungon bangod may mga diperensya sa pirma.
Pila sa mga apektado nga botante ang nagpakig-angot sa opisina sang county clerk agud ireport ang isyu.
Kag sa karun ang opisina sang piskal sang District County nagapatigayon na sang imbestigasyon.
