Natumod nga hungod nga ginbilin sang 22 anyos nga iloy ang iya bag-ong bun-ag nga lapsag sa hilamonan sa Hda. Guanzon, Barangay Mansilingan, Bacolod City kagab-i.
Sa interview sang Bombo Radyo Bacolod kay Department of Social Services and Development (DSSD) Head Alma Gustilo, ginapasalamat na lamang nila nga nakit-an sang tatlo ka nagapanamang ang lapsag nga naputos sa lampien kag may katupad pa nga beberon, gatas, tubig kag pila ka mga gamit sang bata.
Suno diri, gilayon man nga nagdangop sa ila ang amay sang lapsag upod sa ila mga himata.
Paathag ni Gustilo nga kun ang amay ukon iloy lamang sang lapsag ang nagpalapit sa ila, indi nila pag-irelease ang bata, sa baylo magapatigayon anay sang assessment sa parenting capacity sang mga ini.
Apang bangod kaupod man nga nagclaim ang lolo kag lola sang lapsag, ginhatag na lamang nila ang custody, sa kondisyon nga obserbahan ang mga ini.
Natumod nga ginaplano na sang iloy nga ipahulog ang lapsag, apang wala nagsugot ang amay bangod ini ang nakonsensya.
Ang duha ang nagapuyo sa gina-arkilahan nga kwarto kag wala nakahibalo ang ginikanan nga ini ang nagabusong na.
Ini ang ikaduha naman nga bata sang magpartner, apang ang babayi ang ginpahanumdoman na sang iya amay nga indi anay magpabusong bangod siya ang pa-eskwelahon sa kolehiyo.
Pahanumdom na lamang sini nga kun indi masarangan ang pag-atipan sang bata, mas maayo nga dal-on na lamang sa opisina sang DSSD ukon sa Police Station agud mabuligan nga mabutang sa mas maayo nga sitwasyon.
Ini bangod dako ang risgo kun ang lapsag ang ibilin-bilin sa kun diin lamang nga mahimo mabasa sang ulan ukon wala sang makakita tubtob nga mapatay.
Nagpahanumdom man ini sa mga ginikanan nga subaybayan man ang ila mga kabataan kag tuytuyan nga indi makasala.
