Apisar sa pagdugok sang mga bisita sa Handumanan Public Cemetery kagab-i, napabilin naman nga matawhay kag wala sang kinagamo sa sementeryo.
Dako ang volume sang nagdagsa nga pamilya sa nasambitan nga sementeryo nga ginalubngan sang kapin 4 mil tubtob 5 mil nga minatay.
Bangod sa pagdagsa sa bisita, ginhugtan man ang seguridad partikular na sa entrance kag exit points.
Ginatsekyar man sang mga security personnel ang bag sang mga nagasulod agud maseguro nga wala sang matalom nga mga bagay, makahulubog nga ilimnon kag baraha.
Dako naman ang kinalain sang volume sang bisita sang gab-i bangod sang aga tubtob sa hapon, limitado lamang ang mga pumuluyo nga nagbisita.
Apang bangod sa presensya sang madamo nga mga Barangay Tanod kag Public Order and Safety Office (POSO) guards nga nagabulig sa kapulisan, napabilin ang kalinong sang palibot.
Ang nangin concern lamang sang iban nga himata amo ang masiot nga likod nga bahin sang sementeryo.
Ginpaathag naman sang personnel in-charge sa sementeryo nga wala lamang mahingagaw tubtob sa likod ang pagpanghawan sa Handumanan Public Cemetery kag ini ang wala natapos sa pagpatak sang Nobyembre 1.
Sa pihak nga bahin, ginapakamaayo naman nga wala sang nakitaan sang pagtandog sa mga ginahalag nga pagkaon ukon bulak sa mga pantyon sa sementeryo.
Apang bangod sa mabug-at nga lakat sang trapiko, iban sa mga pumuluyo ang ginapili na lamang nga magpanaog sa bangga patyo kag maglakat pasulod.
