Ginsuguran na ang board-up sa bahin sang Bacolod City Government Center ground nga hamtagan sang dancing fountain.
Sa interview sang Bombo Radyo Bacolod kay Engr Loben Seballos, officer in charge sang Bacolod City Engineers Office, nakaligad nga tuig pa kuntani magaboard-up ang contractor sang Tourism Infrastructure and Enterprise Zone Authority (TIEZA).
Apang nag-ayo ang Bacolod City Government nga isuspend anay bangod sa pila ka mga aktibidad kaangay sang Masskara Festival.
Ang proyekto ang iya naman sang Department of Tourism, gani wala sang naggwa nga pondo gikan sa City Government.
Sa baylo sila ang nagafacilitate lamang sa pagpadasig sang mga proseso agud mas madasig man nga mahuman ang proyekto.
Pahayag ni Seballos, nga mahimo ang TIEZA na lamang ang magahatag sang date of completion bangod sa pagkadelay sang proyekto.
Sa karun, padayun man ang ila komunikasyon sa TIEZA kag sa contractor.
Masobra milyon naman ang budget sa proyekto kun sa diin malapit nalang matapos ang sa Bacolod City Public Plaza.
Sila ang magahamtang sang dancing lights kag dancing fountain, kun sa diin mahimo nga regular nga fountain lamang sa aga, samtang pahulagon naman kag pasigahon sa gab-i para sa dugang nga atrasyon.
Sa plaza may ara man sang ginbutang nga kaangay sang tunnel nga may matahom nga lights.
Agud maseguro nga indi ma-abusaran kag makanugon ang milyon nga budget, ini ang pabantayan naman sang kapulisan kag personnel sang Public Order and Safety Office (POSO) agud indi na matambayan ukon matulugan ang area.
