Nangin madinalag-on ang una nga adlaw sang pagbukas sang klase santo sa assessment sang pinuno sang Department of Education Bacolod.
Sa interview sang Bombo Radyo kay Superintendent Reynadol Gico, madamo nga mga kabataan, ginikanan kag mga manunudlo ang nagtambong sa una nga adlaw sang pagbukas sang klase sa tagsa-tagsa ka mga buluthuan sa ciudad.
Suno kay Gico, nangin manami ang response sang mga estudyante kag ginikanan kag nangin smooth ang una nga adlaw sang klase.
Sa karun suno sa iya, blended method sa gihapon ang ginapatuman kun sa diin by set ang klase bangud sa bulan pa sang Nobyembre magasugod ang full impmentation sang face-to-face classes.
Suno sa iya, 74,091 ka mga estudyante ang enrolled na kun sa diin 42,292 ang yara sa junior high school; 12,045 sa Grade 11; kag 9,605 sa Grade 12.
Sa karun nagapadayon pa man ang pagbaton nila sang mga enrollees.
Samtang, full blended learning naman ang ginpatuman sa Progreso Village National High School bangud sa kakulang sang mga classrooms.
Kahapon, mga manunudlo lamang ang nagreport sa eskwelahan sa Progreso Village NHS kag wala mga estudyante.
95 percent naman sang mga estudyante sa Bacolod City ang nagsuksok sang unimporme apisar sang direktiba ni Education Secretary Sara Duterte nga sarang na nga indi magsuksok sang uniform.
Suno kay Gico, kalabanan sa mga manunudlo ang vaccinated na batok sa COVID-19 kag madutay na lamang ang indi.
Nagapanawagan ini sa mga ginikanan nga padayon nga suportahan ang pag-amat-amat transition sang DepEd sa new normal agud makahatag sang dekalidad nga edukasyon sa mga kabataan.
