Gin-athag sang public information officer sang Department of Education Negros Occidental Schools Division nga proposal pa lamang ang petsa nga Agosto 24 bilang pagbukas sang klase sa pungsod para sa masunod nga school year.
Sa interview sang Bombo Radyo Bacolod kay Ian Arnold Arnaez, ginpahayag sini nga kinahanglan pa sang approval ni Presidente Rodrigo Duterte ang nasambit nga plano sang DepEd angot sa kun ano mga tikang nga pagahimuon sang ahensya para sa school year 2020-2021 subong nga may yara sang coronavirus disease 2019 pandemic.
Suno kay Arnaez, napahibalo naman nila ang Inter-Agency Task Force on Emerging Infectious Disease angot sa opening date sang klase.
Nahibaluan nga plano karon sang DepEd nga magpatuman sang alternative learning systems kaangay sang online learning kag offline methods pareho sang take-home readings kag activities.
Dugang pa ni Arnaez, sa Hunyo 1 kinahanglan na nga magreport sa eskwelahan sang mga manunudlo agud preparahan ang masunod nga school year.
Suno diri, ipaidalom ang mga manunudlo sa training agud makahibalo sila pananglitan nga magpatigayon na sang online classes.
Gin-athag man sini nga ginalantaw pa karon sang DepEd kun may ikasarang bala ang mga estudyante nga mag-online classes kag kun may mga resources bala ang mga ini subong man sang mga manunudlo.
Suno kay Arnaez, tanan nga mga factors kag mga options ang ila karon ginalantaw kag ginatun-an agud lamang mapadayon ang klase sa masunod nga school year subong nga may yara sang health crisis.
