Napuno sang tumalan-aw ang ginhiwat nga opening ceremony sang Negros Occidental Provincial Athletic Association Meet 2026 sa Panaad Park and Stadium kahapon, Enero 27, 2026.
Madamo sang nagtambong sa seremonya lakip na diri ang mga atleta, mga manunudlo, school heads, superintendent, kag mga ginikanan sang mga atleta.
Nagtambong man si Sagay City Mayor Leo Rafael Cueva kaupod si Vice Mayor Narciso Javelosa Jr. kag iban pa nga mga public officials, apang wala nakatambong si Negros Occidental Governor Eugenio Jose “Bong” Lacson.
Sa mensahe ni Department of Education (DepEd) Negros Occidental Schools Division Superintendent Dr. Gladys Amylaine Sales, ginpahayag niya nga ang Provincial Athletic Association Meet ang nagapakita sang kusog, disiplina, paghiusa, kag karakter sang kada atleta kag ini ang isa ka mabaskog nga testamento nga ang edukasyon kag sports ang naga-updanay.
Suno diri, ang pagpanikasog nga may paghiusa ang ginatagaan sang importansya kag indi ang pagkontrahanay sang kada isa.
Suno diri, ginaduso man ang maayo nga panglawason, kabaskog sang spirit, ang mangin masinadyahon, kag halangdon nga karakter para sa tagsa ka atleta.
Dugang pa niya, ang kabug-usan nga mga tiglawas sang kada dibisyon ang nagabitbit gid sang negrense spirit kag kabakod.
Pormal nga ginbuksan ni Sales ang seremonya kahapon kag gina-agda ang tanan nga magtambong kag mag-isa sa pag-abanse bilang negrense.
Ang Provincial Athletic Association Meet ang pagahiwaton tubtob Enero 31, 2026.
Sa interview sang Bombo Radyo kay Sales, nakita nga maayo ang pag-organisar sang mga DepEd officials sa event kun sa diin matahum kag organisado ang pagplastar sang mga aktibidad.
Suno kay Sales, 10 ka mga ciudad ang magapartisipar sa Provincial Meet 2026 kag ang magadaog ang magahampang naman sa Regional meet kun sa diin ang Bacolod City ang mangin host, nga paagahiwaton sa maabot nga Marso 1 tubtob 8.
Ginpasalamatan sini si Negros Occidental Governor Eugenio Jose “Bong” Lacson kaupod ang tanan nga Schools Division officials, athletes, school heads, kag ang tanan sa padayon nga paghatag sang suporta kag kooperasyon sa pagpatigayon sang amo nga event.
Mensahe sini sa mga atleta nga dapat mapabilin ang respeto kag paghiusa sa isa kag isa, madaog man ukon mapierde.
