Ginatumod pa sang mga kapulisan sang Calatrava Municipal Police Station ang motibo sa pagpatay sa isa ka babayi nga nasapwan nga duguon bangud sa mga pilas nga tuga sang pagbuno sa Brgy. Marcelo, banwa sang Calatrava sang December 21 sang hapon.
Ginkilala ang biktima kay Graisilda Bayarcal, 49 anyos, kasado, isa ka barangay utility volunteer kag residente sang nasambit nga lugar.
Sa interview sang Bombo Radyo Bacolod kay Police Major Ronald Santillan, hepe sang Calatrava Municipal Police Station, nagpauli ang bana sang biktima gikan sa iya ubra sa uma sang nakita nga naghigda nalang kag may pilas tuga sang pagpamuno ang iya asawa gani gilayon ini nga nagpangayo sang bulig sa ila mga kasilingan apisar nga malagyo ang distansya halin sa ila balay.
Gindala pa ang biktima sa ospital apang gindeklarar nga dead on arrival.
Narekober sa crime scene ang kutsilyo nga may dugo kag binangon.
Indi man mapahayag nga pagpangawat ang motibo sa pagpatay sa biktima bangud wala man gintandog ang laptop kag cellphone nga ara sa crime scene.
Gin-athag man ni Santillan nga ang natabo sa biktima ang wala man sang kaangtanan sa insurgency incidents nga natabo sa banwa sang Calatrava sang tinalikdan nga semana.
Padayon sa karun ang imbestigasyon sang Calatrava Municipal Police Station agud matumod ang suspek kag ang motibo sa pagpatay sa biktima.
