Ginahitso na sang Bacolod City government ang pagbutang sang Bacolod Express Service Office ukon BESO sa Ayala Malls Capitol Central sa Gatuslao Street.
Suno kay Mayor Alfredo Benitez, ginaplanuhan na ang una nga Bacolod Express Service Office kun sa diin mapadasig, convenient kag matawhay ang pagproseso sang mga dokyumento.
Ang mga opisina nga igalakip sa BESO amo ang Office of the Civil Registrar, Department of Social Services and Development, Office of the Building Official, Business Permits and Licensure, Office of the City Treasurer, City Health Office, Bacolod City Police Office, Bacolod Traffic Authority Office, Department of Health kag Investment and Tourism Office.
Suno kay Secretary to the Mayor Karol Joseph Chiu, may yara sang space sa Ayala Capitol Central nga butangan sang mga opisina agud mas mahapos para sa mga pumuluyo ang pagproseso sang kinahanglan sang papeles.
Ang space suno sa iya ang ginhatag sang mall sa city government kag ginatinguhaan nga magamit na ini sa mas madali nga panahon.
Ang nasambit nga inisyatibo ang pagsunod sa layi nga Ease of Doing Business.
