Lusot na sa Kamara ang hagna nga nagaduso sang pagbutang sang provincial office sang Commission on Higher Education (CHED) sa syudad sang Bacolod.
Sa interview sang Bombo Radyo Bacolod kay Bacolod City Loan District Congressman Greg Gasataya, ginkompirmar sini nga ang House Bill 4958 kun sa diin nagapanugot nga magpatindog kag magpain sang pondo para sa provincial office sang CHED sa Negros Occidental ang naaprubahan sa third and final reading sa Kamara.
Suno kay Gasataya, sang August ginfile ang hagna kag nagapasalamat siya nga naaprubahan ini sang kongreso matapos ang tatlo ka bulan.
Aminado ang Congressman nga madamo sang mga estudyante kag mga manunudlo ang may kinahanglan nga iproseso sa CHED gani kun ini matigayon, indi na nila kinahanglanon pa nga magtabok sa Iloilo para magfile sang ila mga dokumento.
Gindugang niya man nga indi lang mga taga Bacolod ang magabenepisyo sini kundi ang bilog nga probinsya.
Suno kay Gasataya ang hagna magasaka pa sa senado kag kun ini maaprubahan, ini mangin layi na.
