Welcome development para sa provincial government sang Negros Occidental ang pagbutang sang EB Magalona, La Carlota City, Pulupandan, Sagay City kag San Enrique sa Alert Level 1.
Suno kay Negros Occidental Provincial Administrator Atty. Rayfrando Diaz, ini ang ginhingyo sang Kapitolyo sa DOH Region 6 sa pagsinapol sang Miyerkules nga mapanubuon sa Alert Level 1 ang status sang mga LGUs nga may maayo nga vaccination rate.
Sa idalom sang Alert Level 1, sarang na nga makapatigayon sang fiesta kag full capacity naman ang mga venues kag activities.
Suno kay Diaz, ginakalipay sang Kapitolyo ang pagkilala sa maayo nga vaccination rate sang mga LGUs kag magaserbe naman ini nga basehan sa iban nga banwa kag ciudad nga pasanyugon pa ang vaccination program.
Positibo man ang provincial administrator nga madamo pa sang LGUs nga sarang mapanubo sa Alert Level 1 bangud nagapaspas sang ila vaccination status kaangay sang Cadiz, Victorias, Murcia kag iban pa.
Suno kay Diaz, wala nagakulang ang provincial government sa pagpadala sang suporta sa mga LGUs agud nga sila ang mabuligan nga mapasanyog pa gid ang vaccination efforts.
Sa idalom sang Alert Level 2, ginadumilian pa ang iban nga aktibidad nga ginadugukan sang tawo kaangay sang bulang.
