Preparasyon lamang suno sa abogado ang paghamtang sang US Missile Defense System sa Ilocos Sur inkaso may magluntad nga Regional War
Sa interview sang Bombo Radyo Bacolod kay Atty Jomax Ortiz, ang pagsugot sa paghamtang sang Enhanced Defense Cooperation Agreement (EDCA) sites kag US missile defense system ang indi makabig pagbaligya sang soberanya sang Pilipinas sa Estados Unidos.
Paathag sini nga dapat batunon nga ang Pilipinas ang wala gid sang ikasarang sa pagdepensa sa kaugalingon gani kinahanglan sang alyansa.
Suno sa abogado, indi man piyerde ang Pilipinas kun hamtangan sang US missile defense system bangod ini ang preparasyon samtang ini ang magaserbe man nga detterence sa China nga indi magpadaso-daso sa ila mga tikang.
Pahanumdom ni Ortiz nga kun ang America ang wala naghamtang sang Missile Defense System sa Israel, ini ang madugay na nga nasakop sang Hezbollah kag Hamas, nga kaangay man sa karun sa nagakatabo sa Pilipinas.
Aminado ini nga indi gid man manugsakop sadto ang China bangod sa maragtas Mogolia lamang ang ila nga ginsakop, apang sa tion nga masuguran na sang China ang pag-agaw sang Taiwan, masunod na diri ang Pilipinas.
Indi man maayo suno diri nga kun mag-umpisa na ang pagpanakop sang China amo palang maghulag ang gobyerno ilabi na nga karun ang gyera ang wala na nakabasi sa kadakuon sang ground forces kundi sa kadakuon sang teknolohiya.
Pahanumdom ni Ortiz nga wala naman sang iban nga choice ang Pilipinas kundi ang magsalig sa alyansa kag ang America lamang ang hugot nga masaligan sang pungsod bangod sa mutual defense treaty.
