Nakadepende pa sa desisyon sang asawa sang lineman sang Negros Electric and Power Corporation (NEPC) nga napatay matapos madagdag samtang nagapatigayon sang vegetation clearing sa Circumferential Road, Brgy Villamonte, Bacolod City sang Domingo sang hapon, ang pagdala pauli sa Davao City sang bangkay sang biktima.
Sa interview sang Bombo Radyo Bacolod kay Engr. Leomel Tambanillo, Asst. Vice President for Planning and Business Operations sang Negros Electric and Power Corporation (NEPC), ginpamisahan kahapon sang NEPC ang lineman nga si Jessie James Torremocha, residente sang Davao City apang nagatrabaho diri sa Bacolod sa rolling hills kahapon.
Suno kay Tambanillo, tanan sila sa NEPC ang nagaupod sa kalisod sang nalisdan nga pamilya.
Suno diri, ginahulat pa nila ang desisyon sang asawa ni Torremocha angot sa pagdala balik sa Davao City sang bangkay ni Torremocha.
Ini bangud nahangpan man nila nga nagakasubo pa ang asawa sang lineman sa pagtaliwan sang iya bana.
Personal man ini nga nagpahayag sang kasubo matapos nga may duha ka mga kabataan nga babayi nga nailo sang temprano sa amay.
Nagpasalig man ini nga i-assist sang NEPC ang pamilya sang nagtaliwan nga lineman.
