Dako ang kalipay sang alkalde sa banwa sang La Castellana, Negros Occidental matapos nga magchampion sa Ilomination Festival of Lights sa Dinagyang Festival 2025 ang Bailes De Luces Festival.
Sa intervew sang Bombo Radyo Bacolod kay La Castellana Mayor Rhumyla Nicor Mangilimutan, una indi pa ini kuntani magpasakop matapos nga makabaton sang imbetasyon bangud nga naglupok ang Bulkan Kanlaon apang sa pihak sang krisis nagpasakop ang mga ini.
Suno kay Mangilimutan, una ini nga kahigayunan nga nagpatigayon sang competition ang Dinagyang Festival para sa Festival of Lights kun sa diin gin-imbetar man ang iban nga mga lugar sa Pilipinas nga nagasaulog sang Festival of Lights agud nga magpaindis-indis sa Ilomination Festival of Lights sa ciudad sang Iloilo.
Nagpasalamat ini nga nagchampion ang Bailes de Luces Festival kun sa diin nakuha man sini ang Best in Light Design, Best in Lighted Production Design, Best in Lighted Costume Design and Best in Choreography.
Pila sa mga nagpasakop ang Pandang Gitab sang Oriental Mindoro, Pavvurulun Afi Festival sang Tuguegarao City sa Cagayan, Tanglawan Festival sang San Jose Del Monte sa Bulacan, kag Hermosa Festival sang Zamboanga City.
Ang grand winner sang ILOmination Festival ang nagbaton sang P500,000.
Suno diri, ang nasambit nga kadalag-an ang naghatag sang inspirasyon sa mga kabataan kag nagapakita man ini kun ano ka resilient ang mga pumuluyo sang La Castellana sa pihak sang pagpamahog sang Bulkan Kanlaon.
