Ginalauman ang pagdagsa sang pasahero subong nga udto sa Ceres terminals.
Sa interview sang Bombo Radyo Bacolod kay Jade Marquez, media relation manager sang Vallacar Transit Incorporated, ginalauman nga alas- 11:00 ukon alas- 12:00 sang udto madagsa na ang pasahero bangod natapos na ang holidays kag balik na ang trabaho kag klase bwas nga adlaw.
Suno diri, kahapon amat-amat na nga nagdamo ang pasahero pasulod sa ciudad sang Bacolod kag kalabanan nagbyahe pa gikan sa Dumaguete City, Cebu, Manila, kag Zamboanga.
Samtang, nagpasalig naman si Marquez nga supesyente ang units sang bus nga mabyahe.
Abiso sini, mas maayo nga magpadulong na lang sa terminals para magsakay sangsa maghulat sa kilid sang dalan sa malabay nga bus, bangod kalabanan sa mga bus puno na sang pasahero paghalin pa lang sa terminal kag wala na nagapasakay pa.
Samtang, wala man sa karun sang online booking bangod indi na ini macater sa kadamoon sang mga pasahero sa terminals.
Samtang, nagasaka na ang numero sang mga pasahero nga nagabyahe paggwa sa probinsya sang Negros Occidental.
Sa interview sang Bombo Radyo Bacolod kay Lieutenant Junior Grade Richelito Arbis, Assistant Station Commander sang Coast Guard Station Northern Negros Occidental, as of 6pm kahapon, may narekord sila nga 3,104 outbound passengers samtang 1,913 naman ang inbound passengers.
Suno diri, balik na sa regular trips ang byahe sang barko kag wala sang kanselasyon sang byahe bisan sa maulanon nga panahon bangod wala man sang weather disturbance ukon Low Pressure Area.
Abiso ni Arbis, kun may mag-abot nga vessel mas maayo ng magsakay na lang kag indi na pagsundon ang departure time agud indi na maggutok sa puerto.
Dugang pa sini, sundon ang layi sa pagbyahe kag likawan ang ginadumilian sa mga seaports agud wala sang may madelay nga byahe.
