Indi pa mapatuman sang Bacolod City Police Office (BCPO) subong nga adlaw ang mandu nga dakpon ang nagaangkasanay sa motorsiklo kun wala sila sang barrier bilang measure batok sa paglapta sang coronavirus disease.
Sa interview sang Bombo Radyo kay BCPO spokesperson Police Lt. Col. Ariel Pico, ginpahayag sini nga indi pa mapatuman subong nga adlaw ang nasambit nga mandu bangud wala pa sang implementing rules and regulations kag wala pa man sang may ginpagwa nga disenyo kag materials nga gamiton para sa barrier.
Aminado si Pico nga medyo mangin mabudlay ang ini nga sitwasyon kun mapatuman na bangud posible nga madisgrasya ang backrider kun indi masarangan sang barrier ang hangin.
Bangud nga ginapahanugutan sang inter-agency task force against COVID-19 sang Bacolod ang angkas sa mga mag-asawa kag live-in partner, indi pa sila mangdakop subong nga adlaw apang nagpahanumdum ang tagpamaba nga kinahanglan ibutang sa panghuna-huna sang mga pumuluyo nga wala lang anay sang angkas bangud indi pa klaro kun ano ang mangin desisyon sang national government nahanungod diri.
Suno kay Pico, apisar nga ginapahanugutan ang angkas sa ciudad, kun magpagwa sang mandu ang Department of the Interior and Local Government nga indi ini pwede, kinahanglan gid ini nga dumilian.
