Nakadepende pa sa dalagan sang negosasyon sang grupo sang traditional jeepney drivers and operators kag Bacolod City government offocials kun madayun ang lima ka adlaw nga untat-byahe sa Pebrero 17 tubtob 21.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD) – Manibela, sa pagtakop sang registration sang business permits, plano sang Bacolod City Government nga ipadakop ang mga nagabyahe nga wala sang permits.
Apang pahanumdom sini nga sila ang gina-ipit sang Land Tranportation Franchising and Regulatory Board (LTFRB) kag wala ginhatagan sang prangkisa.
Suno diri, requirement agud makakuha ang isa ka jeep sang mayor’s permit amo ang prangkisa, electronic conformation kag registration.
Gani hugot nila nga ginakondenar ang plano bangod nagakahulugan lamang nga panakpon ang mga unconsolidated traditional jeepneys.
Suno kay Catedral, kun wala sang madihon nga win-win solution, sila ang magapatigayon sang untat-byahe halin Pebrero 17 tubtob 21 nga mahimo updan man sang United Negros Drivers and Operators Center (UNDOC) – Piston kag iban pa nga transport group.
Pahanumdom ni Catedral nga masobra 400 ang jeepney units sang BACOD samtang 128 naman ang sa UNDOC.
Suno diri, indi man nila luyag nga may untat-byahe apang kun indi sila magpatigayon sang transport strike, sila man ang una nga apektado kasubong man ang mga commuters.
Pahanumdom sini nga magluwas sa mahal ang pletehan sa modernized jeepneys, kulang man ang mga units agud macater ang commuting public, gani ini ang makatuga sang dako nga huol partikular na sa mga estudyante kag nagatrabaho.
Sa karun masako ang mga ini sa pagbyahe agud makatipon sang budget agud may magamit sa lima ka adlaw nga untat-byahe.
