Ginaduso sang Department of Energy ang pagdeklarar sang power emergency sa Visayas Grid nga mahimo makabulig sa pagpadasig sa solusyon sang brownout.
Kahapon, ginpatigayon ang Public Hearing sang DOE para sa Visayas Power Crisis sa isa ka hotel sa Lacson Street, Bacolod City.
Ginpangunahan ini sang mga District kag Partylist Representatives upod sa nagkalainlain nga ahensya kag opisina nga may kaangtanan sa energy sector, partikular na ang DOE, National Grid Corporation of the Philippines (NGCP), National Electrification Administration (NEA), Energy Regulatory Commission (ERC), power generators, distribution utilities, kag mga stakeholders.
Suno kay DOE Secretary Sharon Garin, paagi sa pagdeklarar sang power emergency, mapadasig ang mga approval kaangay sang mga permits, mga proyekto kag iban pa nga kinahanglanon nga i-proseso sa pagresolbar sa problema sang supply sang kuryente.
Ini bangud mahimo nga magalawig pa sa tatlo tubtob lima ka tuig ang pagpatukod sang power plant.Dugang pa sini, duha diri ang pwede matabo kun sa diin mahimo nga maga-issue sang Executive Order si President Ferdinand Marcos Jr. ukon magahatag sang emergency power sa Kongreso.
Aminado man ang tiglikom nga ginalantaw sa katapusan sa 2028 pa nila mapatuman ang long-term solution.
Paagi sini nga tikang suno kay Garin, mahatagan sang authority ang DOE lakip na ang ERC kag iban pa nga stakeholders agud mapadasig ang mga kinahanglanon nga i-proseso sa pagsulbar sang power crisis sa Visayas.
