Ginarespeto kag ginasuportahan sang 79 Infantry Batallion sang Philippine Army ang desisyon sang Toboso Local Government Unit (LGU) sa pagdeklarar sang persona non grata batok sa Communist Party of the Philippines – New People’s Army – National Democratic Front (CPP-NPA-NDF) sa banwa.
Madumduman nga napasar ang Resolution No. 77 series of 2026 sa session nga ginpatigayon sa Municipal Council sang Abril 28 para sa pagdeklarar sa CPP-NPA-NDF nga persona non grata kasunod sa natabo nga engkwentro sa Barangay Salamanca nga nagresulta sa pakamatay sang 19 ka gina-alegar miyembro sang NPA.
Sa interview sang Bombo Radyo kay LTCol Eric Alfonso, Commander sang 79 IB, ini ang nagapakita sang mabaskog nga panindugan sang komunidad sa pagsikway sang violence, extortion kag presensya sang rebelde nga grupo sa lugar.
Nanawagan ini sa mga pumuluyo nga buligan kag ipadayon ang pagsuporta sa militar agud matapos na ang problema sa NPA.
Panindugan sini nga trabaho nila nga protektahan ang mga pumuluyo, sigurohon ang kalinong sa mga komunidad kag ang padayon nga pagtinguha agud mauntat na ang mga pagpamahog sang mga rebelde nga grupo.
Padayon naman si Alfonso nga nagpawagan sa nabilin nga mga miyembro sang NPA nga magbalik na sa sabak sang gobyerno kag pasalig nga madamo sang programa nga igahatag sa ila.
