Iga-assess sang Bacolod Transportation and Traffic Management Division (BTTMD) ang mga strategic intersections nga may nagaluntad nga malala nga trapiko sa tion sang rush hour.
Ini kasunod sang ginpalab-ot nga reklamo sa Bombo Radyo Bacolod angot sa malala nga trapiko sa pila ka mga lugar partikular na sa Bangga Escala sa Brgy Estefania.
Sa interview sang Bombo Radyo Bacolod kay City Administrator Atty Mark Mayo, hungod nila nga ginaflashing ang traffic lights sa pila ka mga area kun rush hour kag nagapahamtang na lamang sang traffic enforcers nga amo ang nagaderiher sang trapiko.
Ini bangod sarang mabalanse sang traffic enforcers santo sa ila assessment kun paano masolbar ang traffic congestion.
Apang reklamo sang madamo nga motorista kag commuters nga mas nagalala nagid ang trapiko kun traffic enforcers ang nagamanage, kag ginapakamaayo nga paandaron na lamang ang traffic lights.
Ang pagflashing sang traffic lights ang ginahimo masami halin alas-6:30 tubtob alas-8:30 sang aga kasubong man sa alas-4:00 sang hapon.
Ini ang ginahimo na humalin pa lamang sa nakaligad nga administrasyon.
Isa-isa nga kadtuan sang BTTMD personnel ang mga strategic intersections agud tun-an kun ano ang mas epektibo nga makamanage sang traffic flow sa tunga sang traffic enforcers kag traffic lights.
