Ginaduso sa karun sa Bacolod City Council nga amendahon kag doblehon ang penalidad sa mga traffic violators sa ciudad.
Sa interview sang Bombo Radyo kay Councilor Al Victor Espino, chairman sang Committee on Transportation sa Sangguniang Panlungsod, madamo ang nagasalig bangud magamay lamang ang penalidad sang Bacolod Traffic Authority Office (BTAO) kag Land Transportation Office (LTO) sa mga nagabayolar sa traffic rules sa ciudad gani ginaduso ang pagdoble sang penalidad.
Samtang, suno kay Espino, ginpakigbahin ni Councilor Celia Flor nga naobserbahan sini nga madamo sang mga wing vans ukon 10 wheeler trucks nga kalabanan nagikan sa Mindanao kag nagabolante sang nga wala sang nagakaigo nga permit.
Suno sa konsehal, ila sa karun ginadocument kag gina-establish ang impormasyon tuhoy diri kag tinutuyo nga tapnaon bangud wala sila sang nagakaigo nga permit nagikan sa ciudad.
Suno diri, magluwas sa illegal parking, wala man sila sang permit sa pagbaligya gani indi ini pwede.
Suno sa iya, dapat sila ang magsecure sang permit nagikan sa Bacolod Permits and Licensing Division bangud disbentaha ini sa mga legal nga negosyante nga nagabayad sang nagakaigo nga taxes kag business permit.
Kun maestablish na ang facts, suno kay Espino, magapangayo ini kay Mayor Alfredo Benitez sang otoridad nga lagson ang ini nga mga negosyante sa ciudad kag hatagan sang penalidad santo sa ordinansa.
Samtang, ginpahayag naman sang nagabolante sa ciudad nga duha tubtob tatlo ka adlaw nagakaubos ang mga saging nga ila ginabolante sa Libertad Public Market.
Suno kay Jonel, sa Davao pa nagikan ang ila truck sang saging kag wala ini sang ihibalo kun may yara ini sang nagakaigo nga dokumento.
Suno sa iya, 20 ka tonelada sang saging ang ila ginabyahe sa sulod sang 24 ka oras humalin Davao padulong sa Bacolod.
Suno diri, nagakaubos na ang mga ini sa sulod lamang sang duha tubtob tatlo ka adlaw.
