Kinahanglan ang approval sang National Inter Agency Task Force (AITF) antes ma-downgrade sang ciudad sang Bacolod ang Enhanced Community Quarantine (ECQ) sa General Community Quarantine (GCQ).
Sa interview sang Bombo Radyo Bacolod kay Mayor Evelio “Bing” Leonardia, ginpahayag sini nga santo sa mando ni Presidente Rodrigo Duterte dapat may yara sang approval nagikan sa national AITF antes magpaidalom sa GCQ ang isa ka LGU.
Suno kay Leonardia, nahanda ang exit plan sang Committee on Exit Plan sa pagpanguna ni Councilor Archie Baribar.
Nakatalana naman nga ipasa sa national IATF ang ginpreparar nga exit plan sang ciudad kag hulaton na lamang ang desisyon angot diri.
Suno pa sa alkalde, indi nagakadapat nga ikomparar sang mga pumuluyo ang sitwasyon sang probinsya kag ciudad bangud wala nagakapareho ang sircumstansya nga ginapangatubang sang mga ini.
Ginpahayag man ni Leonardia nga dapat amat-amat lang nga transistion ang himuon sang ciudad bangud indi mahimo nga gulpiyada nga tikang ang ubrahon.
Nagahingyo man ini sang paghangop sang mga pumuluyo bangud ang tikang nga ginahimo sang ciudad ang para sa kaayuhan sang tanan.
Samtang naghingyo man ang alkalde nga sundon sang mga pumuluyo ang total lockdown sa adlaw sang Domingo.
Nagapati man ini nga dako nga bagay ang mahimo sang isa ka adlaw nga lockdown paagi man sa pagkooperar sang mga pumuluyo.
Nahibaluan nga subong nga Domingo ang ika-apat na nga Domingo kun sa diin naka-lockdown ang Bacolod.
