Liwat nga ginkwestiyon ni Senator Rodante Marcoleta ang pagdumala ni Senate President Pro Tempore Panfilo “Ping” Lacson sa Blue Ribbon Committee natuhoy sa imbestigasyon sang flood control scam, partikular na ang mga gina-alegar kondisyon ni Lacson bilang chairman sang komite antes ipadayon ang hearing.
Suno kay Marcoleta, ginapabudlayan pa ni Lacson ang proseso sang imbestigasyon sang Senado.
Suno diri, indi dapat mangin rason ang kakulangan sang pirma sang mga senador sa partial committee report agud mapatigayon ang hearing kag mapagwa na ang resulta sang imbestigasyon.
Ginpaathag sini nga ang mandato sang komitiba nga hibaluon ang mga responsible sa paggasto sang pondo sang pungsod, apang suno diri, daw wala sang direksyon si Lacson.
Ginapunto ni Marcoleta ang kakulangan ni Lacson bilang chairman sang komitiba nga ipatawag ang mga personalidad nga ginatudlo sang mga testigo sa mga nauna na nga hearing.
Samtang, ginpanginwala naman ni Lacson ang mga pahayag ni Marcoleta.
Suno kay Lacson, ikaduha na ka beses nga gin-imbitar sang komitiba si anay House Speaker Martin Romualdez nga ginpaagi sa House Speaker bangud sa inter-parliamentary courtesy.
Apang wala man nagatambong si Romualdez.
Sa ulihi, ginapahayag ni Marcoleta nga mapirma lamang ini sa partial committee report kun napatawag na ang tanan nga kinahanglan imbestigaran kag mangin maayo ang resulta sini sa hearing sang Blue Ribbon Committee.
