Sa ginpatigayon nga Christmas Eve Mass ukon MIsa de Gallo kagab-i sa Triumph of the Holy Cross Parish, liwat nga ginpahanumdom nga indi ang petsa ang importante sa Paskwa kundi ang pagdumdom sa pagkatawo ni Ginoong Hesu Kristo.
Sa homiliya ni Rev Fr Chris Gonzales, may mga nabatian ini nga nagapahayag nga daw indi na nila mabatyagan ang Paskwa subong nga tuig.
Pahanumdom sini nga ang petsa sang kaadlawan sang tawo ang sarang lamang ma-islan, apang ang importante amo ang pagdumdom nga ang indibidwal ang natawo sa kalibutan.
Sa Paskwa, pahanumdom ni Fr Chris nga ang ginadumdom amo ang pagkatawo ni Hesu Kristo.
Pahayag pa sini nga dapat man nga balikan ang mga nagkalatabo subong nga tuig, kun sa diin kita ang naka-eksperyensya sang madamo nga pagtilaw.
Lakip na diri ang paglupok sang Bulkan Kanlaon, paglaslas sang Bagyo Tino nga nasundan pa sang Bagyo Uwan, linog, mga pagbaha, kag ang pagkawat sang pondo sang gobyerno nga kuntani natalana para sa flood control.
Apang bisan mag-atubang sa mga kalalat-an, makita sa mga Pilipino nga nagakalipay gihapon kag kaangay nga indi apektado.
Suno kay Fr Chris, ini ang wala nagakahulugan nga kita ang kabalan, kundi bangod sa pagtuo.
Ang Christmas, ang pahanumdom sa pagtumod sang Diyos sa Iya promisa nga pag-abot sang manluluwas.
Kapid sini ang promisa sang kasanag kag paglaom.
Apang ginakasubo man ni Fr. Chris nga kaangay nga wala na ginahatagan sang importansya ang angelus prayer nga dapat ginatukar tatlo ka beses sa isa ka adlaw.
Sa pagtukar sang Angelus prayer, dapat man nga magpondo kag magpamalandong.
Suno kay Fr Chris, ini kuntani ang pahanumdom sa kun ano ka maayo ang Diyos.
Kaangay man sa Christmas, nga dapat indi lamang regalo, panami-nami sang panapton, kag madamo nga handa ang ginapinsar, kundi ang pagkatawo sang Diyos.
Pahanumdom pa sini nga ang Diyos ang natawo sa pasungan, kag ini ang masami naga-upod sa mga labing gamay, labing kubos, kag labing pigado.
