Ginpanawagan sang gobernador sa probinsya sang Negros Occidental nga permi dumdumon ang extra ordinary nga pagsakripisyo sang mga baganihan sadto agud makaangkon sang kahilwayan ang Pilipinas.
Ginpangunahan ni Governor Eugenio Jose “Bong” Lacson ang selebrasyon sang 127th Philippine Independence nga may tema nga “Kasaysayan, Kalayaan, Kinabukasan.”
Ang aktibidad ang una nga ginpatigayon sa Negros Occidental Provincial Capitol Lagoon, apang sang magtulo ang ulan, nadesisyonan nga ini ang ipadayun na lamang sa social hall sang provincial capitol.
Nagtambong man sa aktibidad ang mga kapulisan, militar, boys scout kag girls scout of the Philippines, department heads kag iban pa nga ahensya sang gobyerno.
Sa speech ni Governor Lacson, extra ordinary ang nangin sakripisyo sang mga baganihan nga naghalad sang kabuhi agud makuha ang kahilwayan gikan sa mga dumuluong.
Pahayag sang gobernador nga costly kag demanding ang freedom.
Ini ang costly ukon mahal bangod antes nakuha ang kahilwayan, madamo sang naghalad sang kabuhi kag gin-ula nga dugo.
Samtang matawag naman ini nga demanding bangod ang na-angkon nga kahilwayan ang kinahanglan nga padayun nga proteksyonan.
Suno kay Lacson, kadungan sa pag-enjoy sa kahilwayan, dapat nga kontrolahon man ang nagaluntad nga kapigaduhon, inequality, corruption, environment degradation kag social division.
Panawagan sang gobernador nga dapat wala sang Pilipino nga mabilin sa tabtaban.
Samtang gintawag man sini nga modern heroes ang mga first responders sa mga kalamidad kaangay sang paglupok sang Bulkan Kanlaon.
