Disiplina sa trabaho gid ang nagapanguna nga ginaduso sang panibag-o nga Philippine National Police (PNP) Chief.
Sa interview sang Bombo Radyo Bacolod kay Bacolod City Police Office (BCPO) Director Police Col. Noel Aliño, disiplina sa trabaho ang una nga ginduso ni Police Major General Rommel Francisco Marbil kalakip na ang pagdumili sa paggamit sang cellphone samtang on-duty.
Paathag sini nga number 1 nga nagapugong sa pagluntad sang krimen ang Police presence.
Apang bisan yara ang presensya sang pulis apang nakatutok naman sa cellphone, may ara gihapon sang mangisog nga maghimo sang krimen.
Matapos makita ang ang sensiridad sa panindugan ni Marbil, nahambal naman ni Aliño nga ini ang matuod nga lider.
Kalakip man sa luyag malikawan amo ang pagtulog sang mga Police personnel samtang yara sa trabaho.
Panindugan sang BCPO director nga dapat nga naka-alerto ang mga kapulisan partikular na ang mga yara sa dalan agud maprotektahan ang seguridad sang mga pumuluyo.
Aminado man si Aliño nga kun kaisa kinahanglan gid man nga maggamit sang cellphone partikular na kung may emerhensya.
Gani case-to-case basis man ang pagpatuman sini, ilabi na nga sa masami cellphone man ang ila nga gamit sa pagpadala sang report.
Sa pihak nga bahin, agud maminimize ang paggamit sang cellphone, nga mahimo mamis-interpret sang mga pumuluyo, luyag ni Aliño nga makaprocure sang nagakaigo nga radyo.
Aminado ang BCPO Director nga may nagakaigo nga radyo ang mga Police Personnel apang kulang ang repeater, nga iya naman sa karun nga ginapropose sa Police Regional Office 6
