Pagfile ni Senator Imee Marcos sang “President Rodrigo Duterte Act,” ginsabat lamang sang Malacañang sang “Good luck!”

“Good luck!” Ini lamang ang nangin sabat sang Malacañang sa ginfile ni Senator Imee Marcos nga “President Rodrigo Duterte Act”.

Suno kay Palace Press Officer Undersecretary Claire Castro, kabahin sang trabaho sang mga Senador ang maghimo sang layi para sa mga pumuluyo kag para sa ikaayo sang pungsod kag indi lamang para sa kaugalingon nga interes.

Nahibaluan nga antes ang pagfile sang nasambit nga hagna, nagpatigayon man sang senate inquiry ang Senador sa ginpatigayon nga pag-aresto kag pagturn-over kay Duterte sa ICC.

Santo sa explanatory note sa nasambit nga hagna, tinutuyo sini nga malikawan ang mga kaso sang extraordinary rendition ukon pwersahan nga pagturn-over sang mga akusado sa mga foreign court kaangay sang ginapangatubang nga sitwasyon ni former President Rodrigo Duterte sa International Criminal Court.

Ang sinuman nga maglapas ang posible nga mapriso sang tubtob 20 ka tuig.